Президенттік жастар кадр резерві – Мемлекет басшысының тікелей бастамасымен қолға алынған, мемлекеттік басқару жүйесіне білікті де білімді жас мамандарды тартуға бағытталған бірегей жоба. Осы уақытқа дейін өткізілген үш іріктеу барысында 60 мыңнан астам үміткер бақ сынап, олардың арасынан 400 жас маман резервке алынды. Қазіргі таңда солардың 80%-ы мемлекеттік органдар мен ұйымдарда табысты қызмет атқарып жүр. Бұл – жобаның тиімділігі мен оның нақты нәтижесін айқындайтын көрсеткіш.
2025 жылдың 1 маусымынан бастап елімізде Президенттік жастар кадр резервіне кезекті іріктеу басталды. Бұл – мемлекетіміздің болашағына бейжай қарамайтын, жаңаша ойлайтын, бастамашыл жастар үшін үлкен мүмкіндік. Іріктеуге қатысуға ниетті азаматтар 30 маусымға дейін pkrezerv.gov.kz сайты арқылы өтініш бере алады.
Биыл өткізілетін төртінші іріктеудің басты ерекшелігі – әрбір кезеңде салалық бағыттар бойынша пропорционалды іріктеу қағидатын сақтау. Яғни, үміткерлер тіркеу кезінде қай салада еңбек еткісі келетінін нақты көрсетіп, сол бағыт бойынша ғана сынақтан өтеді. Бұл – кадр резервінің құрылымын теңгерімді түрде қалыптастырып, әр салада білікті мамандардың лайықты өкілдігін қамтамасыз етуге мүмкіндік береді.
Іріктеу алты кезеңнен тұрады. Бірінші кезең – құжаттарды қабылдау. Ол 1 маусымнан бастап онлайн жүйеде жүзеге асады. Екінші кезеңде үміткерлердің мәтіндік және сандық ақпаратпен жұмыс істеу қабілеті бағаланады. Ең жоғары балл жинаған үміткерлер келесі кезеңге өтеді. Үшінші кезеңде кандидаттар эссе жаза отырып, нақты проблемалар бойынша өз ұсыныстарын ұсынады. Төртінші кезең – құзыреттерді бағалау, ол ассессмент-орталық пен сұхбат форматында өтеді. Мұнда көшбасшылық, мәселені шешу, проактивтілік сияқты маңызды дағдылар тексеріледі. Бесінші кезеңде үміткерлер сарапшылар комиссиясының алдында әңгімелесуден өтеді, ал соңғы алтыншы кезеңде Ұлттық комиссия 50 үздік кандидаттың есімін бекітеді.
Іріктеуге жасы 35-тен аспаған, жоғары білімі мен кемінде 5 жыл еңбек өтілі бар, қазақ тілін В1 деңгейінен төмен емес меңгерген Қазақстан азаматтары қатыса алады. Алайда, бұл жобаға Президенттің өзі тағайындаған тұлғалар, саяси қызметшілер, «А» корпусының мемлекеттік әкімшілік қызметшілері және қазіргі резерв мүшелері қатыса алмайды.
Президенттік жастар кадр резерві — бұл ел дамуына нақты үлес қосуға дайын жастарға берілетін сенім мен жауапкершілік. Осы бастаманың арқасында мемлекеттік басқару саласында жаңа форматтағы, бәсекеге қабілетті жас буын қалыптасып келеді. Алдағы жылдарда да бұл үрдіс жалғасып, еліміздің әр салада жаңаруына серпін береді деп сенеміз.
Мемлекеттік қызметке елге адал еңбек етуді мақсат тұтқан, жаңашыл идеяларымен бөлісуге дайын жастар үшін бұл – теңдессіз мүмкіндік. Сондықтан көшбасшылар қатарына қосылуды қалайтын әрбір жасты осы мүмкіндікті пайдалана Президенттік жастар кадр резервіне іріктеуге қатысуға шақырамын. Барлық қажетті ақпарат pkrezerv.gov.kz сайтында қолжетімді.
Қобылан Манап, ҚР Мемлекеттік қызмет істері агенттігінің Жетісу облысы бойынша департаментінің басшысы, Әдеп жөніндегі кеңес төрағасы.
