Қасқыр мен шибөрі тәрізді жыртқыштар халықтың қауіпсіздігін сақтау, ауыл шаруашылығы мен үй жануарларын індеттен қорғау және мал шаруашылығына елеулі шығын келтірмеу үшін саны реттелетін жануарлар қатарына енгізілген. Алайда, оларды арнайы рұқсатсыз аулау заңға қайшы әрекет болып табылады және мұндай жағдай анықталса, заң бойынша жауапкершілікке тартылатынын ескертеміз.
Зиянды жыртқыштармен күрес жүргізу үшін жыл сайын берілетін рұқсат қағазын «Е-лицензиялау» порталы арқылы өтінім жіберіп алуға болады. «Саны реттелетін жануарларды алу үшін рұқсат беру» мемлекеттік қызметі толық автоматтандырылған, сондықтан өтінім қызмет көрсетушінің араласуынсыз қабылданып, өңделеді.
Өтінім толтыру кезінде азамат тек өз атына ғана өтінім бере алады, бұл жүйеде электрондық цифрлық қолтаңба (ЭЦҚ) арқылы автоматты түрде жүзеге асады.
Қасқыр мен шибөріні аулауға рұқсат алдын ала дайындалған биологиялық негіздеме бойынша, белгіленген квота шеңберінде беріледі. Егер лимит аяқталса, рұқсат қағазы берілмейді. Мұндай жағдайда аңшылық маусымында жергілікті аңшылық шаруашылықтарына жүгінуге болады.
Басқа уақытта ауыл тұрғындары мен шаруа қожалықтарының малдарын қорғау, жыртқыштардан келетін шығынды азайту немесе алдын алу үшін жергілікті әкімдіктер орман және аңшылық шаруашылығы ұйымдарымен, сондай-ақ рұқсаты бар аңшылармен бірлесіп арнайы топ құрып, санын реттеу жұмыстарын жүргізеді. Қауіпті жағдай туындаған кезде аталған мекемелер мен ұйымдарға барып көмек сұрауларыңызға болады.
Өтінім беру барысындағы осы және басқа да жаңалықтарды Инспекцияның ресми Instagram парақшасынан (jetisuoti_lhzhm) біле аласыздар.
Р. Адильбекова, Жетісу облыстық орман шаруашылығы және жануарлар дүниесі аумақтық инспекциясының бас маманы.
Telegram
Instagram
