Қазақстан Республикасы Мемлекеттік қызмет істері агенттігінің Жетісу облысы бойынша департаментінің қызметкерлері Ішкі мемлекеттік аудит және мемлекеттік Еңбек инспекциясы комитетінің Жетісу облысы бойынша департаменттерінде мемлекеттік қызметтегі әдептілік мәселелеріне арналған семинар-кездесу ұйымдастырды.
Іс-шараның мақсаты – өз қызметінің заңдылығы мен ашықтығын қамтамасыз етуге ұмтылатын мемлекеттік қызметшілердің әдеп нормалары туралы хабардарлығын арттыру болды.
Кездесу барысында мемлекеттік қызметтегі әдеп нормаларын сақтау және қызметтік өкілеттіктерді пайдалануға байланысты құқық бұзушылықтардың алдын алу мәселелеріне баса назар аударылды. Талқылау барысында мемлекеттік қызметшілерді үстеме жұмысқа заңсыз тарту тақырыбы кеңінен қарастырылды. Қатысушыларға үстеме жұмысқа тарту тек тиісті негіздер болған жағдайда және Қазақстан Республикасының Еңбек кодексіне қатаң сәйкестікте ғана жүзеге асырылуы мүмкін екені түсіндірілді. Артық жұмыс істеу мемлекеттік қызметшінің кәсіби тиімділігіне және жеке өміріне теріс әсер етуі мүмкін болғандықтан, олардың құқықтарының сақталуын қамтамасыз ету және заңсыз үстеме жұмысқа жол бермеу қажеттілігі атап өтілді.
Сонымен қатар, қызметтік автокөліктерді жеке мақсатта пайдаланудың алдын алу мәселесі талқыланды. Мұндай әрекеттер адалдық қағидаттарына қайшы келеді және мемлекеттік органдардың беделіне нұқсан келтіруі мүмкін. Семинар барысында қызметтік автокөліктерді пайдалану тәртібін бақылау мен есептілікті күшейту жөнінде ұсыныстар айтылып, осы нормаларды бұзудың ықтимал салдары туралы түсіндірілді.
Сондай-ақ жиын барысында мемлекеттік қызметшілер арасында құмар ойындарға әуестік мәселесіне ерекше назар аударылды. Баяндамашылар құмар ойындарға әуестену мемлекеттік қызметшінің моральдық бейнесіне қойылатын талаптарға сай келмейтінін атап өтті. Мұндай әрекеттер қызметкердің жеке өмірі мен кәсіби қызметіне кері әсерін тигізіп, сыбайлас жемқорлық тәуекелдері мен қаржылық қиындықтарға әкелуі мүмкін екені айтылды. Қатысушылар құмар ойындардан бас тарту – тек жеке таңдау ғана емес, сонымен қатар мемлекеттік қызметке деген сенімділікті сақтау талабы деген ортақ пікірге келді.
Мұндай семинар-кездесулер мемлекеттік қызметшілер арасында құқықтық және әдеп мәдениетін арттыру бағытындағы жұмыстың маңызды бөлігі болып табылады. Іс-шараға қатысушылар ұйымдастырушыларға өзекті мәселелерді ашық талқылауға мүмкіндік бергені үшін алғыстарын білдіріп, мемлекеттік қызметте кәсібилікті сақтау үшін мұндай кездесулерді тұрақты өткізу қажеттігін атап өтті.
Қ. Манап, ҚР Мемлекеттік қызмет істері агенттігінің Жетісу облысы бойынша департаментінің басшысы, Әдеп жөніндегі кеңестің төрағасы.
