2026 жылғы 1 шілдеден бастап Қазақстан Республикасында азаматтардың құқықтары мен бостандықтарын қорғауға бағытталған мемлекеттік кепілдіктерді одан әрі нығайтқан жаңа Конституция күшіне енді. Конституцияда әрбір азаматтың денсаулығын қорғауға және сапалы медициналық көмек алуға құқығы айқындалған. Бұл еліміздің денсаулық сақтау жүйесін одан әрі жетілдіруге берік құқықтық негіз қалайды.
Мемлекеттік саясаттың негізгі міндеттерінің бірі – медициналық көмектің сапасы мен қолжетімділігін арттырумен қатар халықты денсаулық сақтау саласындағы мемлекеттік қолдау шаралары туралы уақытылы әрі сенімді ақпаратпен қамтамасыз ету. Өз құқықтары мен мүмкіндіктерін жақсы білетін азамат медициналық көмекке дер кезінде жүгінеді, профилактикалық тексерулерден уақытылы өтеді және өз денсаулығына жауапкершілікпен қарайды.
Бүгінде мемлекет қоғамдық денсаулықты нығайтуға бағытталған кешенді шараларды жүзеге асыруда. Міндетті әлеуметтік медициналық сақтандыру жүйесі жетілдірілуде, алғашқы медициналық-санитариялық көмек дамытылуда, заманауи цифрлық технологиялар енгізілуде, профилактикалық бағдарламалар кеңейтіліп, вакцинация жүргізілуде және медициналық қызметтердің қолжетімділігін арттыру бойынша жұмыстар жалғасуда.
Халықтың медициналық сауаттылығын арттыру – аталған бастамалардың табысты жүзеге асуының маңызды шарты. Осыған байланысты медицина ұйымдары азаматтарға аурулардың алдын алу, тұрақты профилактикалық тексерулерден өтудің маңызы, салауатты өмір салтын ұстану және қолданыстағы заңнама аясында медициналық көмек алу мүмкіндіктері туралы тұрақты түрде ақпараттық-түсіндіру жұмыстарын жүргізеді.
Талдықорған қаласының облыстық ауруханасының ұжымы денсаулық сақтау саласындағы мемлекеттік саясатты қолдай отырып, халықтың медициналық сауаттылығын арттыруға белсенді үлес қосуда. Аурухана мамандары тұрғындар арасында санитариялық-ағарту жұмыстарын тұрақты жүргізіп, аурулардың алдын алу, салауатты өмір салтын қалыптастыру және қолжетімді медициналық қызметтер мәселелері бойынша кеңес береді.
Қазақстан Республикасының жаңа Конституциясының денсаулық сақтау саласындағы ережелерін іске асыру халық денсаулығын нығайтуға, медициналық көмектің сапасын арттыруға және азаматтардың өз денсаулығына жауапкершілікпен қарау мәдениетін қалыптастыруға ықпал етеді. Талдықорған қаласының облыстық ауруханасы алдағы уақытта да халыққа сапалы медициналық көмек көрсетіп, денсаулықты сақтау мен нығайту мәселелері бойынша сенімді ақпарат тарату арқылы осы міндеттердің орындалуына өз үлесін қоса береді.
Монгол АНАРБЕК, «Талдықорған қаласындағы облыстық аурухана» мемлекеттік коммуналдық кәсіпорны директоры.
Telegram
Instagram
